小溫雜記

Friends, long time no see!

星期四, 1月 18, 2007

不吐不快

小溫同朋友相處時,習慣左直腸直肚。同朋友相處,又唔係響公司對住D假口假面o既同事,做乜仲要扮晒野?所以小溫同朋友講野時唔鍾意玩兜圈。但係當小溫好老實咁因能力所限拒絕朋友o既要求之後,就俾其他朋友噴到一面屁,

事發響三個月前,小溫o既一對情侶朋友Keith同Edith分手,原因係Edith覺得對Keith冇左愛情o既感覺。問題黎喇,雖然佢地只係拍左兩三年拖,但係阿Keith就係愛死Edith果種痴心漢子。更大鑊o既係阿Keith早已經認定Edith會係佢未來老婆,所以當佢知道左Edith要同佢分手,佢好似痴左線咁,精神大受打擊。

分手一兩個星期之後,阿Keith開始周圍打俾我地一班朋友,叫我地好好照顧Edith。但初時好多人都唔知佢地兩個分開左,所以朋友圈內就互相打聽係咩事,更加有人去問Edith。當小溫仲未收到Keith o既追魂call時,Edith就打俾小溫,小溫亦好老實(or八卦,你話小溫係點就點啦)咁問Edith係咪冇彎轉,佢亦好老實咁答我係冇彎轉的。

鬼整幾日後阿Keith就msn小溫,問想搵小溫出黎,傾下點樣先可以追得番Edith。咁小溫既然收到Edith的訊息,加上果排公司同學校都正值high season,氣都冇時間抖,加上明知件事都冇彎轉,小溫咪同阿Keith講:「我真係冇能力幫到你喇,你搵其他人幫你啦。」咁阿Keith又冇咩回應,咁小溫就唔理咁N多啦。

點知過左一兩個月,老友Mavis就打黎鬧小溫,話小溫做咩唔出去聽下阿Keith呻。我咪即時答佢「嘩大姐,我自己返工返學都已經忙到死,休息時間都冇。何況我知道件事係冇彎轉,出去幫佢咪即係害佢?我咪唔應承佢囉。」「咁佢都只係想搵人聽下佢呻嘛?」「喂小姐,佢同我唔係話想聽人呻架,佢話想我幫佢追番Edith返黎丫,我明知唔得,點幫o者?我話幫唔到佢都好正常o者?」小溫講完之後,最後都係俾Mavie噴左一輪。

講真,隔左咁多個月,小溫條氣都仲係chok住chok住的。唔係小溫小氣,而係當小溫唔想令Keith誤以為自己仲有機會追番Edith,所以拒絕左Keith的要求,反而係我俾人噴?小溫係一個老實人,如果能力範圍唔得,就一定話唔得。小溫唔想俾人有個美麗o既誤會,反而俾人鬧番轉頭,小溫條氣係好唔N順架喇,你話小溫點都好啦。

======================

抖左一輪,終於有心機寫下野,希望小溫僅有果幾個讀者仲會記得返黎留低腳毛,出下聲挺下小溫啦。

5 Comments:

  • At 5:44 上午, Blogger 馬沙 said…

    頭號讀者未天光就報到,Sir!!

    唔開心做乜? 自己認為冇做錯就得!

    豈能盡人如意,但求無愧於心!

    吼吼吼吼

     
  • At 12:06 下午, Blogger 渣估 said…

    吼!

    顧掂自己先, 咁你個 Janice 又點呀?

     
  • At 2:01 上午, Blogger 溫仁賓 said…

    馬沙兄:

    多謝你o既支持!
    我都明白做事只求無愧於心,不過俾人咁話完條氣都係唔順。

    渣兄,

    我...衰左啦...Janice話唔想開始新戀情喎...一聽到就知呢個原因唔係真正原因。可能我只係唔係佢喜歡果類型掛。

     
  • At 2:05 上午, Blogger 溫仁賓 said…

    馬沙兄,

    自從你響730寫野之後,你就冇再響blog寫野喇喎。有冇機會寫番D文章俾blog讀者獨家欣賞呀?

     
  • At 12:23 下午, Blogger 馬沙 said…

    小溫,

    首先,在730 D野已經係我想寫嘅野!

    另外工作實在太忙,又要學同個仔玩.

    不過都唔係冇喎!如: 迷失中環 - 馬沙篇 (16/12/2006) ....

    Janice個道,我唸"唔想開始新戀情"可能係真....女仔唸嘢有時好奇怪.可試多一次,問清楚點解.

     

張貼留言

<< Home