休業數天

最近被學校的mid-term test和presentation煩死，完全沒有時間寫blog或在各大高手的blog中留言。小溫都是要休業數天，等所有事都完成，然後才回來。

不過，小溫可以在此預告，回來後將會寫回最近一件事，這件事令我從未與死亡距離那麼接近，數天後見。

1874

一首小溫一直很喜歡的歌，送給大家。

1874
曲：王雙駿 詞：黃偉文 編曲/監製：王雙駿

仍然沒有 遇到 那位跟我絕配的戀人
你根本也 未有出現 還是已然 逝去

懷疑在某一個國度裡 的某一年 還未帶我到世上那天
存在過 一位等我愛的某人 夜夜為我失眠

*從來未相識 已不在 這個人 極其實在 卻像個 虛構角色
莫非今生 原定陪我來 卻去了 錯誤時代

情人若 寂寥地 出生在 1874 剛剛早 一百年 一個世紀
是否終身 都這樣 頑強地等 雨季會 降臨赤地
為何未 及時地 出生在 1874 邂逅你 看守你 一起老死
互不相識 相處在 同年代中 仍可 同生 共死

Repeat *

情人若 寂寥地 出生在 1874 剛剛早 一百年 一個世紀
是否終身 都這樣 頑強地等 雨季會 降臨赤地
為何未 及時地 出生在 1874 邂逅你 看守你 一起老死
若果不可 相約在 和平地方 也與你 暢遊戰地
為何未 及時地 出生在 1874挽著你 的手臂 徹夜逃避
漫天烽火 失散在 同年代中 仍可 同生 共死

口水流

今日本身心情極差，因為吃了幾隻大死貓，又被老闆又7又9又N般噴，不過當回家看一看70F小姐的倩影之後，甚麼氣也沒有，只得不停流口水。

曼城＊韋斯咸

曼城終於終於終於終於終於識入波同贏波喇，我都等得你地耐喇。上一場對車仔打成均勢都要輸，我都覺得好唔抵，今晚識羸波，希望唔駛打護級啦。拜託皮雅斯做好呢份工，唔好掛住做阿公果份呀。

韋斯咸又係十N場不勝之後贏波，不過贏得好有爭議性。一個都唔知係唔係十二碼，另一個就波連入唔入白界都有排拗。

小溫的M

呢期小溫M到，尤其係今晚溫爸溫媽返左大陸，得番一支公就M得更加緊要。

近幾日諗起自己就快大學畢業，開始有點對於前路的迷茫。大大話話都讀左五年，過呢段日子o既時候，成日諗住快D讀完就可以甩難。事實上，五年來差唔多每一個星期都至少要返三晚學o既生活，令我呢幾年變得好dry，夜晚o既gathering冇晒，家庭生活都唔見左一大截。放左學返到屋企就開餐，食完飯抖兩個鐘頭就走去訓覺，訓醒又要返工，都咪話唔頹。

但係到左最近，開始覺得自己慢慢冇左目標咁，讀完書拎到張沙紙又點呢？諗轉工？又覺得自己唔夠料同人鬥。諗轉行？小溫有諗過去金融行業，唔係諗賺得多錢的原因，而係自己o既興趣係對住D金股外匯，不過唔知有冇人有興趣請一個會計人去做金融。同時間，我又要照顧兩老，因為佢地都係退休人士，我唔食佢地都要開飯，屋企幾百樣開支都要我俾，轉工／轉行人工低左，對於佢地都唔係好事。留響而家o既公司，我冇咩動力響畢業後仲留響度，我都唔想做死一世會計文員，我都想有進一步的提升，而呢D提升，響而家公司我係冇可能得到。

同時，見到身邊一班由中學到而家識左N年o既朋友，無論響事業，生活同埋感情方面，發覺自己就好似駝背佬行路－－「中中」下咁。眼見有D朋友拍左拖十幾年，有D更加準備或者已經結婚，工作上又有D成就（例如係部門阿頭），自己就兩袖清風，連女仔手都好耐冇掂過，咁多野撈埋就M到喇。

可能有人會話「車！你條茂利發女寒之嘛！」。我只可以話，到左一D年紀，身邊少左一個人做emotional support自己，生活就特別難捱。有陣時，自己一條麻甩佬夜晚響MK on下on下咁行，見到人地拖男帶女，你話冇hard feeling就假。好似今晚咁，溫爸溫媽都去左旅行，我一支公響屋企，望住四幅牆，加上睇完渣估兄講靈堂o既事，我又會諗下他朝有日兩老走左之後，得番一個人o既生活係會幾孤寂。

今晚真係唔好意思，要大家睇我呢條茂利響度自怨自艾。不過，我都想俾大家去知道我多一D野，有陣時對住自己真實o既老死都唔方便講出口。響呢度做個排洪，希望可以幫到自己啦。都好夜喇，早抖各位。

也許

我不會甜言蜜語，
但懂得用心去愛，去用行動證明愛的存在，
我不會令人失望，令人心傷。

但為什麼在茫茫人海中找不到欣賞我的人？

也許，
也許我的樣子太過斯文，
也許我的樣子不夠吸引。

有沒有人願意與我共死同生？

老闆＝阻頭阻勢？

剛剛過左果個星期，係我近呢半年黎最準時收工的一個星期。原因係老闆同GM都出左trip，手頭上要完成的工作都可以好快手咁做完。而且冇左兩個巨頭響公司，個個同事都樂得耳朵清靜，唔駛受佢地兩個的噪音轟炸。

成班同事見手頭工作做得快，就響度討論下老闆令公司運作慢的問題，得到最少兩個重點：

一、老闆故意製造問題黎令員工忙到團團轉。小溫曾經試過俾老闆問，某某客人在十幾年前所欠的爛賬收妥與否。問都不止，老闆仲叫小溫去搵番資料出黎俾佢睇。當小溫千辛萬苦在貨倉搵番資料出黎，正準備答老闆時，佢竟然話佢係記得咩事，不過想我去查證有冇錯。我就用左一整個上午去幫佢搵野。

二、老闆在一些小事上決策作出拖延，去顯示自己在公司的決定性。小溫身為打雜一名，好多公司入面的文儀器材（如打字機、傳真機等）的購置都要經老闆批准。但明明器材舊到原廠都停左保養，老闆死都唔肯換部新，結果等到部機壞左，公司就收唔到fax先心息。此外，好多時公司好多小事，基本上可以由admin去決定，但佢都要阻一阻admin先可以去做。

講真，冇左巨頭響度，公司照樣運作，效率仲比巨頭響度快，又唔會有「突擊測驗」俾我地，同事又可以早D收工，大家都輕輕鬆鬆做野。小溫相信有睇雜記的老闆們應該唔似我老闆咁，但做老闆係咪要做成咁麻煩，先顯得自己響公司的地位係咁重要？

Eason + Edison + Eric / 多謝各位

Eason + Edison + Eric

星期二晚開show喇喎，我千辛萬苦搵到兩張，有無知音人都會去睇？

====================

多謝各位

最近響幾位知名的blogger中見到小弟blog的連結，小弟在此多謝幾位（馬沙、渣老闆同埋CK老闆）的厚愛。

七歲冥壽

七年前的今日，我和前度女友開展了一段令我成長的感情。

這是我第一段，亦是目前唯一一段真真正正的愛情。雙方的性格、生活習慣等等都南轅北轍，但我們最清楚的，就是我們知道大家都是深愛著對方，願意為這段感情作出改變，互相扶持，將雙方的距離拉近。

雖然大部分的時間她遠在加拿大，但我們沒因為天各一方而離棄對方。不過，既然她說出大家的感情已經淡如水，那麼平靜地結束五年半的感情，總好過要大吵大鬧，連做朋友的機會都沒有。

感情已經結束了，我也找不到任何理由我們可以重新在一起。今天行文，只是想為這一段感情的冥壽做個註腳。