餐廳奇遇

尋晚同三條麻甩佬去明珠食越南菜，一坐低點完菜幾條友就開始拎NDS出黎打孖寶賽車。係呀，我地friend底o既，真係一人有一部NDS，出黎食飯時對戰都幾壯觀。

打到咁上下就開始食野，食到中途隔離檯就有對男女黎左。

我地四條佬一路食一路吹水，講下股票野又講下公司野咁。當我地講到其中一個佬就快升職，個樣都開始有經理feel果陣，隔離檯果位小姐就開始用眼尾瞄過黎。我同另外一條佬都留意到，打個眼色後就再邊吹水邊留意果位小姐o既動靜。

之後，位小姐竟然瞄左好多次，甚至有兩三次係拎埋頭過黎望我地話似經理果條佬。到我地執野走人果陣，我地兩個特登行先，然後拎轉頭望下果位小姐，見到佢竟然係用斜啤o既方法望住果條佬！我地兩個即時嘩左出黎，妳洗唔洗望得咁揚呀。

離開左明珠，我地兩個即刻講番件事出黎，當事人竟然完全唔留意到，反而另外第四條佬都留意到。果位小姐為咩望左條佬咁耐？真奇怪。